رَفرَفْ جناح المشاعر في سماي وفي بلادي
مثْل ما رفرف بصيتِ المجدِ والعزّة علمْها
حلّق الإبداع من بين الألم والجرح بادي
محبرةْ بوحي نزيف الجرح وِإلْهامي قلمْها
كلّ مُوقِفْ يوقض أوجاع الشعر بالشعر غادي
هو ملاذ الرّوح يوم الرّوح تسجن في ألمها
لا حكيت الليل ما استوعب تراتيل افتقادي
تصعب حروف المشاعر فالظروف وفي خِضمها
والقوافي درب وأمشي به على صهوة جوادي
هي طريقي اللي أدلّه يا عساني ما عدمها
لو تسافر بي إلى حيث انعزالي وابتعادي
الحزن يطغى على صبري وروحي ما هزمها!!
ما عرفتِ ْفعمرِيَ اللي جاوز حدود اعتقادي
معركة طيبِ النوايا عقليَ الرّاسخْ حسمها
والشجاعة ما توقّفها الرياح اللّي تعادي
صرت أقول الكلمة اللي قلبي الطيّب كتمها
وصرت أواجه كلّ خوفٍ يوقدِ بْنَفسي عنادي
دام للعزّة صروح ، الذلّ ما قرّب حرمها
العمر رحلة وأنا حلم العمر فالعمْر زادي
يفلح اللي حدّد الوجهة وخارطته رسمها
كلّ حالم يأخذ القبلة ويرفع بالأيادي
يلتقي بالحلم فالواقع لو النيّة عزمها
................................
