لي عام بين افكاري مناوش أرماح
والصمت ينجح باكتساب احترااامي
ماسك لساني بايدي وكلي اجراح
ماسولف إلا باستشارة محامي
لو اعطي افكاري مساحه للإفصاح
والله فلا تلقون حتى اعظامي
عن حرب مابين المفاسد والإصلاح
كلن يقول القاضيه من حزامي
وانا عشان أعيش راضي ومرتاح
إصلاح نفسي يستحق اهتمامي
على سنين الطيش مريت لماح
يثبت مدى وعيي سوابق كلامي
اعطي قبل لا اخذ لو ظروفي شحاح
واشوف قلب الطاوله من إمامي
والشعر ماهو مثل ماقلتو .. سلاح
مافك نفسه من يدين الحرامي
كل يوم اشوف ابياتي بـ دار ومراح
مع اختلاف الازمنه والأسامي
لا يحسبون ان اللقب ريشة جناح
يفرقهن أسلوبي وبصمة إبهامي
وانا لو استخدم قصيدي للأرباح
يمدي مسدد دين ابوي وعمامي
.............................
